اس طرف سے: مجسمے اور جملے- آخیر

July 1, 2015

مجسمے اور جملے- آخیر

مجسموں اور جملوں کی آخری قسط ملاحظہ کریں۔ اگر کوئی مجسمہ یا کوئی ملک رہ گیا ہو تو بھول چوک لین دین ۔ ویسے اگر بھول چوک لین دین میں درست طور زیر زبر نہ لگائی جائے تو جملہ بذات خود ہی زیر و زبر ہو کر رہ جاتا ہے اور بات کے کئی نئے در کھلتے ہیں اور اسی بنیاد پر میں جب بھی کہیں دیکھتا ہوں کہ فلاں زبان دنیا کی مشکل ترین زبان ہے تو میں ان کی لاف زنی پر ہنس کر رہ جاتا ہوں کہ میرے خیال میں اردو بولنا اور درست لہجہ میں بولنا اور پڑھنا کوئی آسان کام نہیں بس جیسے مسلمان پیدا ہوگئے ہیں ویسے ہی پیدائشی اردو آ گئی ہے وگرنہ ہم بھی مانگٹا، وانگٹا کی گردان دوہرا رہے ہوتے اور اردو کی ایسی کی تیسی اب سے بھی زیادہ کر رہے ہوتے۔

بات مجسموں کی ہے اور ان پر کسی گئی پھبتیوں کی ہے تو اگر کوئی مجسمہ ہمارا بلاگ پڑھ لے اور تبصرے سے ملول ہو تو اس سے پیشگی معذرت کہ ایک تو ہم نے یہ تبصرے کیے ہی نہیں دوسرا کیے تو تمیز کے دائرے میں کیے تیسرا یہ سمجھ کر کیے کہ مجسموں کو اردو آئے گی تو واہیاتگیاں پڑھ سکیں گے۔ ویسے بتاتا چلوں "خواب مرتے نہیں" والا مجسمہ اب تک دیکھے گئے تمام مجسموں میں سے میرا پسندیدہ ہے اور اس کو دیکھنے کے لیے دوبارہ واسا، فن لینڈ جانے کا موقع ملا تو میں انکار نہیں کروں گا۔ اور ہاں یہ اوپر تصویر میں میں نہیں ہوں کہ میں اتنا تخلیقی اور قابل نہیں کہ ایسا عمدہ کام کر سکوں۔